لما الجودة توجه استخدام الـAI... كلنا مستفيدين!
مجال الجودة وسلامة المرضى جامد جدًااا يا جماعة… وشعارنا «جامدين ومفيش إلا إحنا»! 😊
أوعوا تفهموني غلط! وتبًّا للتواضع والجو ده! 😊
ده شعار أسبوع الجودة العالمي 2026 هو اللي بيقول:
Quality: Powering Performance
يعني الجودة هي القوة الدافعة لتحسين الأداء.
استنوا... هو إحنا فاهمين الجودة صح؟!
سامعة حد بيقول: هي الجودة دي اللي هي زيارات الاعتماد، وإننا كلنا نستعد لزيارة المقيمين والحاجات دي؟!!!!
لا طبعًا!
دي لقطة واحدة بس من الصورة الكبيرة للجودة.
الجودة في الرعاية الصحية ليها 6 أبعاد أساسية، بنختصرها في كلمة STEEEP:
- Safe: رعاية آمنة تحمي المرضى من الضرر اللي ممكن نتجنبه.
- Timely: خدمة في الوقت المناسب، من غير تأخير ممكن يأثر على صحة المريض أو حياته.
- Effective: رعاية مبنية على الدليل العلمي وتحقق أفضل نتائج ممكنة.
- Efficient: استخدام أمثل للوقت والموارد من غير هدر.
- Equitable: رعاية عادلة لكل مستفيد من غير تمييز.
- Patient-centered: نحترم صوت المريض واحتياجاته وتفضيلاته، ونشركه هو وأسرته في قرارات الرعاية.
بس أنا مش جاية أتكلم عن الجودة بس!
أنا جاية أتكلم عن الجودة + AI!
من نهال إلى NEHAL!
لما سألوني: إيه اللي اتغير فيكي لما بدأتي تتعلمي الذكاء الاصطناعي؟
قلتلهم: بقيت NEHAL! 😎
New Efficient Healthcare AI Leader
وبقى عندي رسالة نفسي أوصلها لكل واحد في منظومة الرعاية الصحية.
طلاب الكليات الطبية، أعضاء هيئة التدريس، الأطباء، التمريض، الصيادلة، المختبرات، مكافحة العدوى، الجودة، الموارد البشرية، المالية، الإداريين والقيادات…
كل واحد فينا يقدر يضيف قدرات الـAI لخبرته وشغله، فيزود إنتاجيته، ويحسّن جودة أدائه، ويساهم في تعزيز سلامة المرضى وتحسين تجربة المستفيد.
بس طبعًا باستخدام مسؤول وواعي!
وخدوا بالكم… أنا بقول نضيف، مش نستبدل!
لأن إحنا الأساس، ومينفعش نلغي دورنا وخبرتنا.
AI = Artificial Intelligence
ولما نستخدمه لتعزيز قدراتنا وخبراتنا، مش لاستبدالها، ده المفهوم اللي بنسميه:
Augmented Intelligence
وده المفهوم اللي أنا بحبه وبشجعه جدًا.
إحنا الـPilot، والـAI هو الـCopilot، والجودة هي بوصلة الرحلة!
إحنا اللي بنحدد المشكلة والهدف، وإحنا اللي بنراجع ونقرر ونتحمل المسؤولية.
الـAI يساعدنا نحلل ونخطط وننجز ونبتكر.
والجودة تساعدنا نسأل:
هل اللي عملناه صح؟ هل آمن؟ هل حقق نتيجة؟ وإزاي نقيس التحسين؟
بس استنوا... هل السرعة معناها جودة؟
تخيلوا مثلًا ممرضة استخدمت الـAI عشان تصمم Handover Checklist لتسليم وتسلم المرضى بين الـShifts.
جميل جدًا!
لكن هل مجرد تصميم الـChecklist معناه إن جودة التسليم اتحسنت؟
هنا بقى تيجي عدسة الجودة!
بدل ما نكتفي إننا صممنا نموذج شكله حلو، نراجعه مع الفريق، ونجربه، ونقيس اكتمال المعلومات أثناء التسليم، ونشوف هل النواقص قلت فعلًا ولا لأ.
يعني نقارن الأداء قبل وبعد التطبيق.
وبكده نكون جمعنا بين:
خبرة الممارس الصحي + منهجية الجودة + قدرات الـAI = تحسين قابل للقياس.
لأن فيه فرق كبير بين إن الـAI يساعدنا نخلص مهمة أسرع، وبين إنه يساعدنا نحسّن جودة الأداء فعلًا.
طيب… ما تيجوا نضمّ NEHAL لفريقنا؟!
استنوا… مش قصدي تضمّوني أنا شخصيًا لفريقكم!
مع إن يشرفني طبعًا! 😊
أنا قصدي إن كل واحد فينا يقدر يكون:
NEHAL — New Efficient Healthcare AI Leader
ويكون AI Champion في مكان شغله.
مش لازم يكون اسمك نهال!
ولا لازم تكون خبير في كل أدوات الـAI.
كل اللي محتاجه إنك تبدأ بخبرتك، وتفهم التحديات اللي بتواجهك أو بتواجه فريقك، وتستخدم عدسة الجودة في فهمها وقياسها، والـAI في مساعدتك على تطوير حلول عملية ليها.
طيب... كفاية كلام! يالا نجرب عملي!
أنا مش عايزاكم تخلصوا قراءة المقال وتقولوا: كلام جميل، وتقفلوا الصفحة!
عايزة كل واحد يجرب بنفسه، أيًّا كان تخصصه أو وظيفته في منظومة الرعاية الصحية.
وعشان كده جهزت لكم 2 Prompts، اختاروا اللي يناسبكم، وانسخوه في أي أداة AI بتستخدموها، زي ChatGPT أو Gemini أو Claude.
Prompt الأول: عندك مشكلة في شغلك ومحتاج حل؟
ده لأي حد عنده تحدي أو مهمة بتستهلك وقته، وعايز يعرف إزاي يستخدم الـAI في تحسينها.
انسخ prompt ده، وغيّر بس المعلومات اللي بين الأقواس:
"أنا أعمل في [تخصصك/وظيفتك] بقسم [القسم] في [نوع المنشأة الصحية].
عندي المشكلة أو التحدي التالي: [اشرح المشكلة ببساطة].
عايزك تساعدني أفكر بعقلية تحسين الجودة (Quality Improvement)، وأستفيد من قدرات الـAI في تطوير حلول عملية.
ابدأ بأنك تسألني عن المعلومات الناقصة لفهم المشكلة، وبعدها:
- حلل المشكلة واقترح أسبابها المحتملة، مع توضيح ما يحتاج للتحقق.
- اقترح 3 حلول عملية ممكن أستخدم فيها الـAI، ووضح الأدوات المناسبة.
- اختار معايا أسهل حل نبدأ نجربه، واشرح خطوات تنفيذه بالتفصيل.
- اكتبلي الـPrompt اللي أحتاجه للتنفيذ.
- اقترح مؤشرات بسيطة (KPIs) أقيس بيها الأداء قبل وبعد التطبيق.
- وضح المخاطر والاحتياطات المطلوبة، وإيه اللي لازم أراجعه بنفسي.
خليك عملي ومناسب لطبيعة شغلي. ما تفترضش نتائج غير مثبتة، وما تستبدلش الحكم البشري أو القرار السريري."
Prompt التاني: لسه ما استخدمتش الـAI ومش عارف تبدأ منين؟
ولا يهمك! ده معمول مخصوص ليك.
انسخ prompt ده:
"أنا أعمل في [تخصصك/وظيفتك] في مجال الرعاية الصحية، ولسه مبتدئ في استخدام الذكاء الاصطناعي.
عايز أكتشف إزاي الـAI ممكن يساعدني في شغلي ويحسّن جودة أدائي.
اتعامل معايا كمبتدئ، وابدأ بأنك تسألني شوية أسئلة بسيطة عن طبيعة شغلي والمهام اللي بعملها يوميًا.
وبعد إجابتي:
- اقترح عليّ 5 استخدامات عملية للـAI مناسبة لتخصصي.
- وضح فايدة كل استخدام وإزاي ممكن يوفر وقت أو يحسّن جودة العمل.
- رشّحلي أسهل استخدام أبدأ أجربه.
- اختار أداة مناسبة، وعلمني أستخدمها خطوة بخطوة، كأني بجرب لأول مرة.
- اكتبلي Prompt جاهز أنسخه وأستخدمه، مع مثال تدريبي ببيانات افتراضية.
- عرفني إزاي أراجع النتيجة وأقيس الفايدة اللي حققتها.
استخدم لغة بسيطة، واشرح المصطلحات الجديدة، وما تفترضش إني عندي خبرة سابقة."
وقبل ما تجربوا، اتفاق صغير بيننا!
ما تشاركوش أي بيانات شخصية للمرضى أو معلومات سرية خاصة بالشغل مع أدوات غير معتمدة من منشآتكم.
وافتكروا إن مخرجات الـAI محتاجة مراجعتكم، خصوصًا في أي حاجة مرتبطة بالرعاية أو سلامة المرضى.
دلوقتي بقى... الدور عليكم!
اختاروا prompt اللي يناسبكم، وجربوه.
ومستنية تشاركوني على LinkedIn:
- تخصصك إيه؟
- جربت أنهي Prompt؟
- الـAI اقترح عليك إيه؟
- وإيه اللي استفدته أو ناوي تجربه فعلًا؟
ولو لسه في بداية التجربة، شاركوني التحديات اللي واجهتكم.
خلونا نتعلم من تجارب بعض، ونحوّل الأفكار لتطبيقات وتحسينات حقيقية.
لأن الجودة مش مسؤولية قسم الجودة بس، والـAI مش حكر على خبراء التكنولوجيا!
كل واحد في منظومة الرعاية الصحية يقدر يقود تحسين الجودة في نطاق شغله.
People Lead. Quality Guides. AI Augments. Performance Improves.
يالا نخلي في كل منشأة صحية، وفي كل فريق…
NEHAL
New Efficient Healthcare AI Leader
لأن لما الجودة توجه استخدام الـAI... كلنا مستفيدين!