عبث الذكاء الاصطناعي
استمع لهذا المقال
بصوت كريم (Karim)
بما ان كل حاجة بتتغير مجتش ع الكتب يعني..ما هي لازم كمان تتغير ..لكن الفكرة هيا بتتغير ازاي؟!
سمعنا عن مشاكل شركات الذكاء الاصطناعي وخصوصاً أنثروبيك مع ناشرين وأصحاب حقوق ملكية فكرية وعن دعاوي بتعويضات ضخمة.
والحقيقة إننا مقتنعين طبعاً ان فيه تناسب عكسي بين التوغل في التقدم والتطور التقني وبين قتل مساحات الخصوصية وحتى الحقوق الأدبية والفكرية..فيه درجة كبيرة من التماهي في النقطة دي..
دلوقتي أي حد بيسأل أي شات بوت بيجاوب ويجيب الداتا من كل حتة ..ويا فرحتي انه بيذكر المصادر؟!..ما خلاص سعاتك حطيت المعلومة جاهزة مقشرة هدخل أنا ليه ايه أوجع دماغي وأدور في الموقع الفلاني ولا أروح افتح الكتب العلاني؟!.
قصة التحايل الواضح من شركات الذكاء الاصطناعي بشرا كتب قديمة ونادرة..شرا الكتب الورقية ..بنتكلم عن أطنان وآلاف العناوين بل بتوصل لستة أصفار وفكها وقطع أوصالها لمسح صفحاتها على مساحات ضوئية ضخمة وبعد كدا رميها في الزبالة لإعادة تدويرها بيوريك الوجه القبيح للرأسمالية والشره المجنون لجمع المعلومات "النضيفة " المستخلصة من عقول البشر في حقبة ما قبل الضوضاء المعرفي وشغل النسخ والتشابه المقيت وفوضي الذكاء الاصطناعي ..
محدش يبرر دا بإنه عملية حفظ رقمية ..دي قصة والحاصل قصة تانية..هنا احنا ادام عملية تجارية بحتة همها الأول والأخير جمع "بكارة الفكر الإنساني" لعهد ما قبل التلوث المعرفي وظهور أول شات بوتAI قبل نهايةعام 2022.
للأسف طريقة التعامل مع الكتب وخصوصاً النادرة مهينة مع تحويل الكتاب من وعاء معرفي خالص إلى مجرد بيانات تدريب..ياريتهم حتى احترموه بعد ما خدوا اللي عاوزينه ورجعوه زي ما هوا..لأ ارمي يا باشا وشوف غيره ..التل كبير وعدد الكتب ضخم وبيسابقوا الزمن قبل غيرهم
محدش يقدر يوقف ويفرمل التطور..دا مش مقبول..لكن في المقابل فإن التطور لا يعني عدم الحفاظ على التراث والتاريخ ..ما الكتب دي بقت جزء من تاريخ وتطور البشرية ..دا الأجيال السابقة كانوا أذكى بكتير ..لكن واضح انه في عصر AI المتسارع المجنون كله بيدور على تحقيق الربح حتى لو هيدوس على بقايا الإنسان الحقيقي اللي جوانا وإنجازاته اللي صعب تكرارها علشان فيها عبق وريحة زمنها الجميل.